一個唔多外遊經驗的我，今次喺第二次去日本😆咁少去旅行，梗喺想好似朱古力蛋廣告話齋，一次過要滿足好多個願望：又睇得、又玩得、又食得咁啦
最後就決定咗向九州出發。
出發前都做晒功課，揾咗想去邊d地方，連GPS code都揾晒，將行程都打晒落個表度
務求每一日都可以爭取時間。知道我呢個行程未必係最好，大家都可以參考下。
值得一提，因為九州好大有好多個縣，建議大家先決定行程，因為行程會影響住宿地點，有d地方較遠加上某d地方唔係日日都開，亦有時間限制。所以我將行程先打落表再決定住宿。
呢次嘅酒店、機票、租車都喺分開買的。
出發喇
為咗要玩到盡，就貴D買咗早機。零晨4點就要起身，都真係幾眼瞓。上到機就梗係爭取時間瞓啦。
一早知道第一日咁早起身會好攰，所以第二日先租車。而第一日嘅行程就安排咗去近近地嘅市中心，方便搭車。當然酒店都book 咗近市中心。
到喇
原來由福岡國際機場去福岡JR駅係要搭一程車，好在機場有免費車接送，真係貼心
到埗就梗係先去酒店放低行李。酒店就位於袛園駅，由福岡到袛園駅，搭3個站就到，車程只需要5-10分鐘。
由JR駅行去酒店都係5分鐘左右，跟住google map都好易揾。而日本酒店真係只能夠喺限定的check in 時間或之後先可以check in。未攞到房，我地就喺前台先登記同寄存行李，所以大家去日本要留意酒店的check in 時間。
放低行李就去揾嘢食。發現酒店附近有個地下街食市，就揾咗間日式丼嘅餐廳。剌身同天婦羅都不錯，成個set¥1000食到飽飽
食飽就到附近「櫛田神社⛩️」走走，行過去都喺8分鐘。
最開心發現神社內有類似京都嘅「伏見稻荷」（因為上次去京都miss咗）。一排橙紅色鳥居，影相特別靚，不過我著住橙色衫搞到痴晒地😅
行到咁上下就返咗酒店check-in。日本酒店就唔特別介紹，因為酒店房都真係幾細，一入房就係床，有個好細嘅廁所，浴缸都好細，轉個身都撞到，都唔夠位放喼。攞到房，就安排咗半個鐘休息時間比自己😀為下一站天神地下街儲下腳骨力。
Go go go
天神地下街就位於天神駅內，由祇園去天神只要2個站就到。咩出口都會見到地下街，一出閘就可以行街買嘢
地下街好大，咩都有得買，服飾、鞋、袋、藥妝、小食鋪同餐廳都有。裝修就模仿歐洲風格，地方又夠大，都幾好行。不過價錢就唔算好平，要比心機揾下心頭好。
行咗3個鐘係時候去食個晚飯。之前見到網上介紹「華味鳥」喺九州必食之選。都plan咗其中一晚去食，原來酒店附近就有一間分店，所以就決定食咗先。
無訂枱都係等咗一陣就有位。每一張枱都有屏風隔住，私人度好高。好彩都有中文餐牌，就叫咗d小食同最重要嘅雞肉邊爐窩，因為「華味鳥」最出名係食雞。
全程都有專人服侍，仲會教你點食。一開始就將雞脾肉放入雞湯，雞脾肉係預先煮過，煮一陣就食得。雞肉好滑好香之後專員準備咗2個杯，放咗少少鹽同蔥花就倒入雞湯比我地飲，咁樣飲雞湯都係第一次，個湯好甜之後再落菜同烏冬。
小食就叫咗九州必食的明太子，就咁食就太咸，要叫碗白飯送。最值得推介係雞軟骨肉丸，配埋個蛋黃醬簡直一絕到而家都好掛住。不過價錢唔算好平。
食完飯再去Lawson , FamilyMart 同藥妝行下就完結咗第一日嘅行程。
![]()
《以上發表純屬個人分享》
任何產品試用或出席event,歡迎聯絡GG :-
